काठमाडाैं । प्रधानमन्त्री केपी शर्मा ओलीले देशको शान्ति–सुव्यवस्था अस्थिर पार्न विभिन्न शक्ति सक्रिय रहेको आरोप लगाएका छन्।
शुक्रबार मधेस प्रदेश प्रहरी कार्यालयको प्रशासनिक भवन उद्घाटन गर्दै प्रधानमन्त्री ओलीले केही समूहहरू देशलाई प्रतिगमनतर्फ धकेल्ने प्रयासमा रहेको बताए।
उनका अनुसार, “भड्काउने मानिसहरू धेरै छन्, जसले शान्ति खल्बल्याएर मुलुकलाई राजतन्त्र वा राणातन्त्रतर्फ फर्काउन खोजिरहेका छन्। मौका पाउँदा दुवै उस्तै–उस्तै हुन्,” उनले भने।
प्रधानमन्त्री ओलीले ऐतिहासिक घटनाहरूको स्मरण गर्दै, राणाहरूले अवसर पाउँदा गरेको दमन र राजाहरूले अवसर पाउँदा गरेका कदममा खासै भिन्नता नरहेको टिप्पणी गरे।
उनले २०१७ सालको घटनाक्रम, २०५८ सालको दरबार हत्याकाण्ड, त्यसपछिका राजनीतिक अस्थिरता, निर्वाचित प्रधानमन्त्रीको बर्खास्ती, नेताहरूको थुनाइ तथा जनअधिकार हरणलाई उदाहरण दिँदै, “त्यस्ता अँध्यारा दिनहरू फर्काउन खोज्ने प्रयासलाई हामी रोक्नुपर्छ,” भन्ने चेतावनी दिए।
प्रकाशित मिति: ३० श्रावण २०८२, शुक्रबार
प्रतिक्रिया