काठमाडौँ । नेपाली कांग्रेसका सांसद तथा महामन्त्री गगन थापाले आफू दुई-दलीय संयन्त्रमा हाल सक्रिय नरहेको बताएका छन्।
प्रतिनिधि सभाको बिहीबारको बैठकमा बोल्दै थापाले आफू गत फागुनदेखि संयन्त्रको कामकाजमा संलग्न नभएको स्पष्ट पारे। प्रधानमन्त्री केपी शर्मा ओली र कांग्रेस सभापति शेरबहादुर देउवाको नेतृत्वमा गठित दुई दलको संयन्त्र सरकारका कामकाजलाई प्रभावकारी बनाउनको उद्देश्यले बनाइएको थियो।
२०८१ कात्तिकमा गठन भएको संयन्त्रमा कांग्रेसतर्फ उपसभापति पूर्णबहादुर खड्का, महामन्त्री थापा, गृहमन्त्री रमेश लेखक र परराष्ट्र मन्त्री आरजु राणा देउवा रहेका थिए। एमालेतर्फ वरिष्ठ उपाध्यक्ष ईश्वर पोखरेल, उपाध्यक्ष विष्णु पौडेल, महासचिव शंकर पोखरेल र उपमहासचिव विष्णु रिमाल सदस्य थिए।
थापाले भने, “यो सरकारलाई सफल बनाउने सोचाइका साथ म एउटा भूमिकामा काम पनि गरें। फागुनसम्म सक्रिय भएँ। अहिले त्यस्तो जिम्मेवारीमा सक्रिय नरहेता पनि म कांग्रेसको सांसद र जिम्मेवार पदाधिकारी हुँ। सरकार सफल बनाउनु हाम्रो साझा दायित्व हो।”
सांसद थापाले सरकारलाई सफल बनाउन बन्द कोठाभित्र प्रधानमन्त्री र सभापतिलाई सुझाव दिँदै आएको पनि बताए। उनले संविधान संशोधनलगायत ७ बुँदे सहमति अझै अघि बढ्न नसकेको उल्लेख गर्दै आवश्यक पहलको आवश्यकता औँल्याए।
प्रकाशित मिति: ५ भाद्र २०८२, बिहिबार
प्रतिक्रिया