काठमाडौं । नेकपा (एकीकृत समाजवादी) का वरिष्ठ नेता तथा पूर्वप्रधानमन्त्री झलनाथ खनालले भारत–चीनबीच भएको नेपालविरोधी सम्झौता तत्काल खारेज गर्न माग गरेका छन् ।
खनालले शुक्रबार जारी गरेको विज्ञप्तिमा दिल्लीमा सम्पन्न १२ बुँदे सम्झौतामध्ये ९औँ बुँदाले लिपुलेक मार्ग हुँदै भारत–चीन व्यापार पुनः सुरु गर्ने सहमति गरेको उल्लेख गर्दै यसलाई नेपालको सार्वभौमिकता, स्वतन्त्रता र राष्ट्रिय अखण्डतामाथि गम्भीर आघात भएको बताएका छन् ।
उनका अनुसार उक्त सम्झौताले देशभित्रका साथै प्रवासमा रहेका नेपालीहरूको राष्ट्रिय भावना गहिरो रूपमा आहत बनाएको छ र यसको विरोधस्वरूप नेपालीहरू सडकमा उत्रिन बाध्य भएका छन् ।
खनालले सबै राजनीतिक दल, देशभक्त संघ–संस्था र आम नागरिकलाई राष्ट्रिय हितको पक्षमा एकजुट भई संसद्बाट साझा आवाजमा राष्ट्रिय सङ्कल्प प्रस्ताव पारित गर्न आग्रह गरेका छन् ।
‘भारतीय विस्तारवादी तर्कलाई खारेज गरौँ । नेपालको भू–भागबारे ऐतिहासिक सन्धि–सम्झौता, नक्सा, अभिलेख, भिडियो लगायतका प्रमाण व्यवस्थित गरी नेपाली जनता मात्र होइन विश्वसमक्ष स्पष्ट पारौँ,’ खनालले विज्ञप्तिमा भनेका छन् ।
प्रकाशित मिति: ६ भाद्र २०८२, शुक्रबार
प्रतिक्रिया