काठमाडौं । नेपाली कांग्रेसका नेता डा. शेखर कोइरालाले आन्दोलनरत उखु किसानको माग तत्काल सम्बोधन गर्न सरकारलाई आग्रह गरेका छन्। उनले किसानहरू उखुको बोटसहित सडकमा उत्रनु अत्यन्त दुःखद अवस्था भएको बताए।
कोइरालाले सोमबार एक कार्यक्रममा सरकारप्रति आक्रोश व्यक्त गर्दै भने, “खेती गर्ने बेला मल नपाउने, उपलब्ध मल किन्न किसानहरू लाइनमा उभिनुपर्ने, उत्पादन भएको दूध सडकमा फाल्नुपर्ने, प्रमुख नगदेबाली उखुमा भुक्तानी नपाउने, कहिले अनुदान कटौती हुने-यस्ता परिस्थितिमा देश कसरी खाद्यान्नमा आत्मनिर्भर हुन्छ ?”
कृषिलाई सरकारले प्राथमिकतामा राखेको दाबी केवल किताब र भाषणमा मात्र सीमित नभई व्यवहारमा लागू गर्नुपर्ने कोइरालाले बताए। उनले किसानको माग सरकार तुरुन्तै सम्बोधन गर्नुपर्ने आवश्यकता औंल्याउँदै आन्दोलनरत किसानसँग संवेदना प्रकट गरे ।
प्रकाशित मिति: १० भाद्र २०८२, मंगलबार
प्रतिक्रिया