काठमाडौं । युक्रेनी राष्ट्रपति भोलोदिमिर जेलेन्स्कीले रूसी र युक्रेनी सेनाबीच शान्ति सम्झौताको एक भागको रूपमा प्रस्तावित बफर जोन अस्वीकार गरेका छन्।
शुक्रबार पत्रकारहरूसँग कुरा गर्दै उनले भने, “आजको आधुनिक युद्धको प्राविधिक अवस्था नबुझ्नेहरूले मात्र बफर जोनको प्रस्ताव गर्छन्।” उनका अनुसार फ्रन्टलाइन नजिक ड्रोन आक्रमणको जोखिमका कारण पहिले नै एउटा प्रकारको ‘मृत क्षेत्र’ वा स्वतः बफर जोन युक्रेनी सेनाले बनाइसकेको छ।
युरोपेली नेताहरूले ४० किलोमिटरको बफर जोन मार्फत लामो अवधिको युद्धविराम वा सम्झौता गर्न सकिने बारे छलफल गरिरहेका बेला जेलेन्स्कीले यस्तो प्रस्तावलाई यथार्थपरक नभएको बताएका हुन्। उनले भने, “हाम्रो भारी हतियारहरू फ्रन्टलाइनबाट १० किलोमिटरभन्दा बढी दूरीमा राखिएका छन्, सबै कुरा ड्रोन आक्रमणको जोखिमका कारण।”
जेलेन्स्कीले कुनै पनि सम्झौताले युक्रेनले आफ्नो भूभाग छोड्नुपर्ने अवस्था सिर्जना गर्न नदिने दाबी गरे। उनले रूसले ठूलो दूरीको माग राखेमा मात्रै अस्थायी रूपमा कब्जा गरिएको क्षेत्रबाट पछि हट्न सक्ने स्पष्ट पारे।
रूस–युक्रेन युद्ध ४० महिनाभन्दा लामो समयदेखि जारी छ। अमेरिका नेतृत्वको कूटनीतिक प्रयासले युद्धको समाप्ति प्रक्रियामा गति दिने आशा जगाएको थियो। गत साता अमेरिकी राष्ट्रपति डोनाल्ड ट्रम्प, जेलेन्स्की र युरोपेली नेताबीचको उच्चस्तरीय बैठकले सम्भावित शिखर सम्मेलनको आशा जगाएको थियो।
तर ती आशाहरू कमजोर हुँदै गएको देखिएको छ। जर्मन चान्सलर फ्रिडरिख मर्जले स्पष्ट रूपमा कुनै बैठक नहुने र पुटिन भाग लिन इच्छुक नभएको बताएका छन्।
प्रकाशित मिति: १४ भाद्र २०८२, शनिबार
प्रतिक्रिया