अफगानिस्तानमा भूकम्पमा परेर मृत्यु हुनेको संख्या ९०० पुग्यो

काबुल। पूर्वी अफगानिस्तानमा गएको भूकम्पका कारण मृत्यु हुनेको संख्या ९०० पुगेको छ भने करिब ३ हजार जना घाइते भएका छन्। अधिकारीहरूले मंगलबार जानकारी दिएका छन् कि भूकम्पबाट प्रभावित क्षेत्रका घरधुरी पूर्ण रूपमा ध्वस्त भएका कारण मानिसहरू भग्नावशेषमा फसेका छन् र उद्धारकार्य तीव्र रूपमा जारी छ।

आइतबार राति ६ म्याग्निच्यूडको भूकम्प पहाडी क्षेत्रमा गएको थियो। यसको प्रभावले धेरै गाउँका घरहरू पूर्ण रूपमा भत्किए र स्थानीय बासिन्दा घण्टौँसम्म भग्नावशेषमा पुरिएका थिए।

अफगानिस्तानको राष्ट्रिय विपद् व्यवस्थापन प्राधिकरणका प्रवक्ता युसुफ हम्मदले एसोसिएटेड प्रेससँग भने, “घाइतेहरूलाई उद्धार गर्ने प्रयास जारी छ, त्यसैले मृत्यु र घाइतेको वास्तविक संख्या अझ बढ्न सक्ने सम्भावना छ।”

भूकम्पका कारण केही क्षेत्रमा पहिरो आएर सडकहरू अवरुद्ध भएका छन्, जसले राहत कार्यमा चुनौती सिर्जना गरेको छ। राहत टोलीहरू अहिले प्रभावित ठाउँमा पुगेर मानवीय सहायता पुर्‍याउन सक्रिय छन्।

प्रकाशित मिति: १७ भाद्र २०८२, मंगलबार