काठमाडौं । अमेरिकी राष्ट्रपति डोनाल्ड ट्रम्पले बिहीबार हस्ताक्षर गरेको नयाँ कार्यकारी आदेशमार्फत जापानबाट आयात हुने कारहरूको अतिरिक्त भन्सार (ट्यारिफ) घटाइएको छ। यसअघि २७.५ प्रतिशत रहेको ट्यारिफ अब १५ प्रतिशतमा झरेको छ।
यस कदमले टोयोटा, होन्डा र निसान जस्ता जापानी अटोमोबाइल कम्पनीहरूलाई ठूलो आर्थिक राहत दिने अपेक्षा छ। यो आदेश जुलाईमा गरिएको पूर्वसहमत सम्झौतालाई औपचारिक रूपमा लागू गर्ने प्रक्रिया हो।
सम्झौताअनुसार, जापानी सवारी साधन र औषधिमाथि १५ प्रतिशत मात्रै ट्यारिफ लाग्नेछ। लामो छलफल र वार्तापछि यो सम्झौता प्राप्त भएको हो।
ह्वाइट हाउसले जनाएको छ कि जापानले अमेरिकामा ५ खर्ब ५० अर्ब डलर लगानी गर्ने र क्रमशः आफ्नो बजार अमेरिकी उत्पादनहरूको लागि खुला गर्ने प्रतिबद्धता जनाएको छ।
प्रकाशित मिति: २० भाद्र २०८२, शुक्रबार
प्रतिक्रिया