जनकपुरधाम । जनता समाजवादी पार्टी (जसपा) नेपालका अध्यक्ष उपेन्द्र यादवले नेपाली कांग्रेस र कम्युनिस्ट दलहरू संघीयता र गणतन्त्रप्रति प्रतिबद्ध नरहेको आरोप लगाएका छन्।
शुक्रबार जनकपुरधाममा संघीय लोकतान्त्रिक मोर्चाले आयोजना गरेको ‘वर्तमान राजनीतिक अवस्था : जनजागरण अभियान’ कार्यक्रमलाई सम्बोधन गर्दै उनले संघीय लोकतान्त्रिक गणतन्त्र अहिले सबैभन्दा ठूलो संकटमा रहेको दाबी गरे। यादवका अनुसार, यसको मूल कारण कांग्रेस र कम्युनिस्ट दलहरू नै हुन्।
उनले भने, ‘कांग्रेसले कहिल्यै संघीयताको समर्थन गरेन, न त गणतन्त्रको पक्षमा उभियो। कांग्रेसको मूल सोच सदैव बहुदलीय प्रजातन्त्र र संवैधानिक राजतन्त्रमा सीमित रह्यो। आज पनि त्यसैलाई दोहोराइरहेका छन्।’
यादवले नेपालमा वास्तविक कम्युनिस्ट नभएको दाबी गर्दै भने, ‘कम्युनिस्टको नाममा सत्ता, शक्ति र लाभ मात्र खोज्ने अवसरवादी समूह मात्रै छन्। तिनीहरू संघीयता र समावेशिताको पक्षमा उभिने हैसियतमा छैनन्। अहिले कांग्रेस र कम्युनिस्ट दुवै मिलेर संघीयतामाथि सबैभन्दा ठुलो आक्रमण गरिरहेका छन्। यो नक्कली संघीयता मात्र हो, वास्तविक होइन।’
प्रदेश सरकारहरू अधिकारविहीन र कानुनी आधारहीन अवस्थामा रहेको भन्दै उनले यस्तो संरचना संघीयताको मर्म विपरीत भएको टिप्पणी गरे।
प्रकाशित मिति: २१ भाद्र २०८२, शनिबार
प्रतिक्रिया