काठमाडौं । नेकपा (एमाले) को विधान महाधिवेशनमा स्थायी कमिटी सदस्य कर्ण थापालाई आफ्नो फरक धारणा प्रस्तुत गर्न अध्यक्ष केपी शर्मा ओलीले रोक लगाएका छन्।
महाधिवेशनको हलमै प्रतिवेदन पेश गर्ने तयारी गरेका थापालाई ओलीले त्यस्तो आवश्यकता नभएको भन्दै समूहगत छलफलमै उठाउन सुझाव दिएका हुन्। थापा विद्यादेवी भण्डारीको सदस्यता निलम्बन, ७० वर्षे उमेर सीमा हटाउनेजस्ता विषयमा फरक मत राख्दै आएका छन्।
अध्यक्ष ओलीले प्रतिवेदनसम्बन्धी छलफल हाल १० वटा समूहमा चलिरहेको हुँदा त्यही प्रक्रियामा भाग लिन निर्देशन दिएका हुन्। थापाले तयार पारेको फरक प्रतिवेदन प्रतिनिधिहरूलाई वितरण गरिएको छ।
एमाले प्रचार विभाग प्रमुख राजेन्द्र गौतमका अनुसार, थापालाई हलमा प्रस्तुत गर्ने बाटो बन्द गरिएको मात्र हो, छलफलमा सहभागी हुने अवसर भने कायम छ। ‘उहाँले आफ्नो विचार समूहगत छलफलमा राख्न सक्नुहुन्छ,’ गौतमले स्पष्ट पारे।
प्रकाशित मिति: २१ भाद्र २०८२, शनिबार
प्रतिक्रिया