काठमाडौं। पूर्वप्रधानमन्त्री डा. बाबुराम भट्टराईले जेनजी युवाहरूको आन्दोलन अहिले प्रतिक्रान्तिको दिशामा जाने संकेत देखिएको बताएका छन्।
भट्टराईले सामाजिक सञ्जालमार्फत बताएका छन् कि केही व्यक्तिहरूको उपस्थितिले आन्दोलनको मूल उद्देश्यमा विकृति आएको हुन सक्ने शंका छ। उनले स्पष्ट पारे कि संसद, सिंहदरबार, अदालत र राजनीतिक नेताहरूको निवास छानीछानी आगो लगाउने काम जेनजीको वास्तविक उद्देश्य हुन नसक्ने बताएका छन्।
‘लोकतन्त्रका मुख्य स्तम्भहरूमा आगो लगाउनेहरू को हुन् र तिनीहरूको उद्देश्य के हो?’ भट्टराईले लेख्दै आग्रह गरे, ‘आत्मसमीक्षा गर्नुस् र अब आगो निभाउने काममा लाग्नुस्।’
उनले आन्दोलनमा सामेल केही व्यक्तिहरूलाई ‘ब्वाँसाहरू’ भनी उदाहरण दिँदै सचेत रहन सुझाएका छन्। साथै, फ्रान्सेली क्रान्तिको इतिहास अध्ययन गरेर सिक्न प्रेरित गरेका छन्।
भट्टराईले थपे, ‘दशकौँदेखि लोकतन्त्रको जगमा टिकेर सुशासन र समृद्धिको विकल्पीय राजनीति अघि बढाउने प्रयास गर्दै आएको मानिसमाथि हिंसा र आगजनी गर्न सकिँदैन। मेरो घरमा सुरक्षाकर्मीको सक्रियताले मात्र सुरक्षित रहयो। कतिपय बाहिरबाट आएका व्यक्तिहरूले विशेष रङको स्कार्फ लगाएका थिए, जो जेनजीका युवाहरू जस्ता देखिँदैनन्।’
साथै, उनले वैदेशिक रोजगारीमा रहेका युवाहरूलाई नेपाल आउँदा नयाँ किताब ल्याइदिन आग्रह गर्दै आफूले पनि पुस्तिकाहरू जोगाएर अध्ययन गरिरहेको बताए। उनले डार्विनको चर्चित पुस्तक ‘द ह्युमन नेचर’ लिएर मानवीय स्वभावको अध्ययन गरिरहेको र जेनजीलाई पनि त्यसबाट केही सिक्न सक्ने बताए।
प्रकाशित मिति: २५ भाद्र २०८२, बुधबार
प्रतिक्रिया