काठमाडौं । जनकपुर बम प्रकरणमा दोषी ठहर भई जेल जीवन बिताइरहेका संजय साह (टकला) हाल जनकपुरस्थित आफ्नै घरमा रहेका छन्। उनी घर फर्किएसँगै त्यहाँ राजनीतिक चहलपहल असाधारण रूपमा बढेको छ।
शुभेच्छुकहरू घरमै पुगेर उनलाई बधाई दिइरहेका छन्। कुनै दलमा आबद्ध नभए पनि साहलाई जनकपुरमा ठूला नेताजस्तै सम्मान दिइँदैछ।
साहले आफू जेलबाट निस्कने हतारमा नरहेको दाबी गर्दै भने, ‘मेरो सजाय अवधि पूरा हुनै लागेको थियो। २–४ महिनामा म निस्कने नै थिएँ। मलाई कुनै हतार थिएन। युवाहरूले जबर्जस्ती निकालिदिएका कारण आएको हुँ।’
उनले आफू जेलबाट भागेर नभएको प्रष्ट पार्दै सरकार चाहने हो भने पुनः जेल फर्कन तयार रहेको बताए। ‘जेनजीका युवा र त्यहाँका प्रशासनले जानुस् भनेपछि आएको हुँ,’ उनले स्पष्ट पारे।
राजनीतिक पृष्ठभूमि भएकाले भविष्यमा राजनीतिमा फर्किने संकेत दिए पनि अहिले तत्काल राजनीतिक सक्रियता नदेखाउने उनको भनाइ छ। ‘साथीभाइहरूसँग छलफल गरेर मात्र निर्णय गर्छु। राजनीतिमा फर्केँ भने सेवाभावसहित मात्र आउँछु,’ साहले भने।
प्रकाशित मिति: २५ भाद्र २०८२, बुधबार
प्रतिक्रिया