काठमाडौं । नेकपा (एकीकृत समाजवादी) का महासचिव घनश्याम भूसालले २४ भदौका घटनाले मुलुकभरि राजनीतिक नेतृत्वको कमजोरी र असक्षमतालाई स्पष्ट रूपमा उजागर गरेको बताएका छन्।
सामाजिक सञ्जालमा शुक्रबार पोस्ट गर्दै भूसालले भने, ‘२३ भदौको गोलीकाण्डमा निर्दोष नेपाली युवा–जनताको ज्यान गयो भने २४ भदौको ताण्डवले मुलुकभर हाहाकार मच्चायो। यी घटनाले केवल सरकारको कमजोरी मात्र देखाएन, हामीजस्ता राजनीतिक दलहरूको नैतिक पतन पनि स्पष्ट भयो। हाम्रो राजनीतिक संरचना र प्रक्रियामा यस्तो हरिविजोग कहिल्यै भएको थिएन।’
उनले देशभक्ति, लोकतन्त्र र मुलुकको समृद्धिको आकांक्षा राख्ने सबै राजनीतिकर्मीलाई पार्टीभित्रका पुराना बन्देज र सीमिततालाई तोडेर खुला छलफलमा आउन आह्वान गरे। ‘हामीलाई नेताहरूका स्वार्थ र शक्ति दुरुपयोगले विभाजित गरेको छ। अब कम्युनिष्ट आन्दोलनका सबै सदस्य, विशेष गरी एमाले र माओवादीको प्रशिक्षण पाएका देशभित्र र विदेशका कमरेडहरू, बौद्धिक र सांस्कृतिक योगदान दिने बुद्धिजीवीहरू, सक्रिय समर्थक र शुभचिन्तकहरू एकजुट हुनुपर्ने बेला हो,’ उनले जोड दिए।
भूसालले तत्कालीन सरकारले भदौ २३ गते गरेका गोलीकाण्डलाई नेपालको राजनीतिक इतिहासमा सबैभन्दा निर्दयी र क्रूर घटना भने। त्यसको भयानकता भदौ २४ गते मुलुकभर भएको आगजनी, तोडफोड र लूटपाटसँग तुलना गर्दा पनि कम नरहेको उनको भनाइ छ। उनले यी घटनाहरू केवल सरकारको कमजोरीका कारण नभई सत्तासीन खलनायक र षडयन्त्रकारीहरूले मिलाएर गरेको सुनियोजित हिंसा भएको बताए।
यस क्रममा आन्दोलनका पुराना नेता र दश–सदियौंसम्म निर्माण गरिएका देशभक्ति, लोकतन्त्र र सामाजिक न्यायका मूल्यहरू ठेलिएकामा भूसालले चिन्ता व्यक्त गरे। ‘यसले लाखौं इमान्दार सदस्य र समर्थकमा पीडा, ग्लानी र असन्तोष उत्पन्न गरेको छ। लोकतान्त्रिक गणतन्त्रले खोजेको नेतृत्व र नैतिक मूल्यको अभावले आज हामीलाई यस्ता चुनौतीहरू भोग्नु परेको हो। पार्टीमा पद र सुविधा गुमाउने डरका कारण बहुमत यथास्थितिप्रति उभिएको छ भने, कार्यकर्ताको आवाज अल्पमतमा परिरहेछ। यसको परिणामस्वरुप हामी आफ्नो इतिहासको भग्नावशेषमाथि उभिएर वर्तमान विध्वंसको सामना गर्दैछौँ,’ उनले भने।
भूसालले अब पार्टीभित्र र बाहिरका सबै शक्तिहरूलाई विभाजन तोड्न र ऐतिहासिक एकता निर्माण गर्न तत्पर रहन आह्वान गरेका छन्।
प्रकाशित मिति: २७ भाद्र २०८२, शुक्रबार
प्रतिक्रिया