काठमाडौं । नेपाल पत्रकार महासंघले राष्ट्रपतिले संविधान विपरीत सुशीला कार्कीलाई प्रधानमन्त्री नियुक्त गर्नु र मध्यरातमा प्रतिनिधि सभा विघटन सिफारिस स्वीकृत गर्नुको विरोध जनाएको छ। महासंघले यस कदमलाई जनमतको अपमान र लोकतन्त्रका लागि गम्भीर चुनौती ठहर गरेको छ।
महासंघका महासचिव रामप्रसाद दाहालले जारी गरेको विज्ञप्तिमा उल्लेख छ, ‘अलोकतान्त्रिक र असंवैधानिक कदमको महासंघ घोर निन्दा र भर्त्सना गर्दछ।’
महासंघले भनेको छ कि जेनजी युवाहरूले भ्रष्टाचार र बेथितिविरुद्ध उठाएको आवाज संविधानको दायराभित्रै सम्बोधन गर्ने अवसर मुलुकले पाएको थियो। तर राष्ट्रपतिबाट संविधान विपरीत प्रधानमन्त्री नियुक्ति र प्रतिनिधि सभा विघटन सिफारिस स्वीकृत गरेपछि यसले जनमतको अवमूल्यन गरेको महासंघको ठहर छ।
विज्ञप्तिमा भनिएको छ, ‘यो कदम सर्वोच्च अदालतको पूर्वनिर्णय र संविधानले स्थापना गरेका नजिरसँग पनि विपरीत छ र लोकतन्त्रका लागि अनिष्टको संकेत हो।’
महासंघले संविधानले सुनिश्चित गरेका गणतन्त्र, संघीयता, समावेशिता र अन्य उपलब्धिमा नोक्सानी पुग्न सक्ने आशंका व्यक्त गर्दै, वर्तमान संविधान र उपलब्धिको रक्षा गर्न सबै पक्षलाई जिम्मेवार र सक्रिय भूमिका निर्वाह गर्न आह्वान गरेको छ।
प्रकाशित मिति: २८ भाद्र २०८२, शनिबार
प्रतिक्रिया