काठमाडौं । राष्ट्रियसभाका अध्यक्ष नारायणप्रसाद दाहालले मंगलबार बिहान नवनियुक्त प्रधानमन्त्री सुशीला कार्कीलाई भेटी बधाई दिएका छन्।
प्रधानमन्त्री निवास बालुवाटारमा भएको भेटमा अध्यक्ष दाहालले सफल कार्यकालको शुभकामना दिँदै देशको विकसित घटनाक्रम र समसामयिक राजनीतिक अवस्थाबारे छलफल गरेका थिए।
दाहालको सचिवालयका अनुसार, भेटमा राष्ट्रियसभाको कामकारबाही, बानेश्वरस्थित सङ्घीय संसद् भवन र सिंहदरबारस्थित सङ्घीय संसद् सचिवालयमा भएको क्षतिको विषयमा समेत जानकारी गराइएको थियो।
भेटका क्रममा प्रधानमन्त्री कार्कीले शान्ति र स्थिरता कायम गर्न राष्ट्रियसभाको महत्त्वपूर्ण भूमिका हुने उल्लेख गर्दै वर्तमान राष्ट्रिय सङ्कटलाई समाधान गर्न सबै दल र निकायबीच सहकार्य आवश्यक हुनेमा जोड दिएकी छन्।
प्रकाशित मिति: ३१ भाद्र २०८२, मंगलबार
प्रतिक्रिया