काठमाडौं । लगातारको वर्षासँगै देशका प्रमुख राजमार्गहरू अवरुद्ध भएपछि यातायात मन्त्रालयमा आकस्मिक बैठक बसेको छ।
शुक्रबार रातिदेखि नारायणगढ–मुग्लिन सडकखण्डमा तुइनखोलामा पहिरो खस्दै आएको छ। लगातारको पहिरोका कारण सडक खुलाउन कठिनाइ भइरहेको र यात्रुहरू रातिदेखि नै अलपत्र परेको प्रहरीले जनाएको छ।
शनिबार बिहान यातायात मन्त्री कुलमान घिसिङको उपस्थितिमा सडक विभाग, गृह मन्त्रालय, यातायात व्यवसायी महासंघ र मजदुर प्रतिनिधिहरूसँग आपत्कालीन छलफल भएको छ। बैठकमा सरोकारवालाले अवरोध हटाउने अवस्था र चुनौतीबारे विस्तृत जानकारी प्रस्तुत गरेका छन्।
ट्राफिक प्रहरीका अनुसार, पहिरो खसेको स्थानमा डोजर परिचालन गरिए पनि लगातार ढुंगामाटो खसिरहेकाले काम अघि बढाउन नसकिएको छ।
नारायणगढ–मुग्लिन मात्र होइन, कोशी राजमार्ग र अरनिको राजमार्गका विभिन्न खण्डहरू पनि पहिरोका कारण अवरुद्ध भएका छन्। ती सबै क्षेत्रमा सडक खोल्ने प्रयास भइरहेको प्रहरीले जनाएको छ।
प्रकाशित मिति: ४ आश्विन २०८२, शनिबार
प्रतिक्रिया