काठमाडौं । राष्ट्रिय आविष्कार केन्द्रका संस्थापक महावीर पुनले आफूलाई शिक्षा, विज्ञान तथा प्रविधिमन्त्रीमा सिफारिस गरिएको खबर सार्वजनिक भएपछि समर्थक र शुभेच्छुकलाई बधाई नदिन आग्रह गरेका छन् ।
सामाजिक सञ्जालमार्फत पुनले मन्त्री पदको सपथ अघि फोन गरेर बधाई दिनु वा खादा-माला ल्याउन आवश्यक नभएको स्पष्ट पारेका छन्। बरु शिक्षा क्षेत्र सुधारका लागि उपयोगी योजना भए त्यसलाई ह्वाट्सएपमार्फत पठाउन आग्रह गरेका छन्।
‘मलाई कसैले मन्त्री नभन्नुहोला। यदि कसैलाई मन्त्री भन्नै मन छ भने “कबाडी वैज्ञानिक मन्त्री, भन्नुहोस्,’ उनले लेखेका छन्।
लामो समयदेखि अनुसन्धान र आविष्कारलाई प्रोत्साहन गर्दै आएका पुन सुशीला कार्की नेतृत्वको मन्त्रिपरिषद्मा शिक्षा, विज्ञान तथा प्रविधि मन्त्रालयका लागि सिफारिस भएका हुन्। आजै पुनसहित अन्य नयाँ मन्त्रीहरूले शपथ ग्रहण गर्ने कार्यक्रम तय भएको छ।
प्रकाशित मिति: ६ आश्विन २०८२, सोमबार
प्रतिक्रिया