काठमाडौं । नेपाल विद्युत् प्राधिकरणका निवर्तमान कार्यकारी निर्देशक हितेन्द्रदेव शाक्यले आफूलाई जिम्मेवारीबाट हटाएपछि आगामी कदमबारे परामर्शमा रहेको बताएका छन् ।
आइतबार बसेको मन्त्रिपरिषद् बैठकले शाक्यलाई प्राधिकरणको कार्यकारी निर्देशक पदबाट हटाई जल तथा ऊर्जा आयोगमा सरुवा गर्ने निर्णय गरेको थियो । शाक्यका अनुसार आफूले प्राधिकरणमा रहेर सरकारलाई सहयोग गर्ने योजना बनाएको भए पनि सरकारले आयोगमा पठाएपछि अब त्यहीअनुसार अघि बढ्ने सोच बनाइरहेका छन् ।
उनले सरकारको मनसाय र व्यवहारकै आधारमा आफ्नो भूमिकाको दिशा तय हुने बताए । शाक्यले भने, ‘यदि सरकारले मेरो विशेषज्ञता आवश्यक ठानेर आयोगमा पठाएको हो भने म त्यहीँबाट पनि सहयोग गर्न तयार छु । तर, यदि यो निर्णय प्रतिसोधी भावनाले गरिएको हो भने त्यसअनुसार अघि बढ्न बाध्य हुन्छु ।’
उनले दुईपटक प्राधिकरणको नेतृत्व पाएको भए पनि दुबै पटक काम गर्ने वास्तविक अवसर नपाएको गुनासो गरे । साथै, कानुनी लडाइँमा जानेबारे सोध्दा उनले तत्काल यस्तो कुनै योजना नरहेको स्पष्ट पारे ।
प्रकाशित मिति: ६ आश्विन २०८२, सोमबार
प्रतिक्रिया