काठमाडौं । देशभरका कारागार र सुधारगृहबाट भागेका कैदीबन्दीमध्ये झन्डै आधा पक्राउ परेका वा आफैं फर्किएका छन्।
कारागार व्यवस्थापन विभागका अनुसार २८ वटा कारागार र नौ वटा सुधारगृहबाट भागेका १४ हजार ५४९ जनामध्ये हालसम्म ८ हजार ५४ जना पुनः कारागारमा आएका छन्। फर्किएकामध्ये ७ हजार ७१३ जना कारागारवासी र ३४१ जना सुधारगृहवासी छन्।
विभागका निर्देशक चोमेन्द्र न्यौपानेले केही कैदी आफैं फर्किएको र केहीलाई सुरक्षाकर्मीले नियन्त्रणमा लिएर कारागारमा पुर्याएको जानकारी दिए। उनका अनुसार अझै ६ हजार ४९४ जना फरार छन्। तीमध्ये ५ हजार ८७२ जना कारागारबाट र ६२२ जना सुधारगृहबाट भागेका हुन्।
गत भदौ २४ गते जेनजी आन्दोलनका क्रममा १३ हजार ५८५ जना कैदी कारागारबाट र ९६४ जना सुधारगृहबाट भागेका थिए। त्यही घटनापछि ठूलो संख्यामा कैदी अझै फरार छन्।
यसबीचमा १० जना कैदीबन्दीको मृत्यु भएको विभागले जनाएको छ। हाल देशभरका कारागार तथा सुधारगृहमा कैदीबन्दीको संख्या २३ हजार ४४६ रहेको छ, जुन आन्दोलनअघि ३० हजार ६४६ थियो।
प्रकाशित मिति: १० आश्विन २०८२, शुक्रबार
प्रतिक्रिया