काठमाडौं । प्रधानमन्त्री सुशीला कार्कीले देशभर भइरहेको अविरल वर्षा र त्यसबाट उत्पन्न हुन सक्ने बाढी, पहिरो र डुबानको सम्भावित खतरालाई मध्यनजर गर्दै सम्पूर्ण नागरिकलाई उच्च सतर्कता अपनाउन आह्वान गरेकी छन्।
जल तथा मौसम विज्ञान विभागले आगामी दुई दिनसम्म निरन्तर वर्षा हुने र प्रमुख नदी–नालामा पानीको सतह खतराको तह नाघ्न सक्ने चेतावनी जारी गरेपछि शनिबार राष्ट्रका नाममा सम्बोधन गर्दै प्रधानमन्त्रीले यस्तो अपिल गरेकी हुन्।
उनले जोखिम कम गर्न सुरक्षालाई सर्वोच्च प्राथमिकता दिइएको उल्लेख गर्दै नेपाल प्रहरी, सशस्त्र प्रहरी, नेपाली सेना, स्वास्थ्यकर्मी र प्रशासनिक निकायहरूलाई उद्धार, राहत तथा आपतकालीन सेवाका लागि चौबीसै घण्टा तयारी अवस्थामा राखिएको जानकारी दिइन्।
प्रधानमन्त्री कार्कीले जोखिमयुक्त क्षेत्रमा रहेका नागरिकलाई ज्यान र सम्पत्तिको सुरक्षाका लागि आवश्यक सावधानी अपनाउन आग्रह गर्दै आधिकारिक स्रोतबाट जारी हुने चेतावनी र निर्देशनलाई पालना गर्न अनुरोध गरिन्।
नागरिक सुरक्षालाई पहिलो प्राथमिकतामा राख्ने सरकारको प्रतिबद्धता दोहोर्याउँदै उनले नियमित रूपमा अद्यावधिक सूचना सार्वजनिक गर्ने आश्वासन दिइन्।
यससँगै सम्भावित विपदको जोखिम मूल्याङ्कन गर्दै सरकारले असोज १९ र २० गते देशभर सार्वजनिक बिदा दिने निर्णय समेत गरेको छ।
प्रकाशित मिति: १८ आश्विन २०८२, शनिबार
प्रतिक्रिया