काठमाडौं । काठमाडौंमा भइरहेको निरन्तर वर्षा र नदी–नालाको बढ्दो बहावका कारण बाढीको जोखिममा परेका नागरिकहरूको व्यवस्थापनमा काठमाडौं महानगरपालिका सक्रिय बनेको छ। महानगरका मेयर बालेन साहले बाढीपीडितलाई विभिन्न विद्यालयमा अस्थायी रूपमा बसोबासको व्यवस्था गरिएको जानकारी दिएका छन्।
उनका अनुसार हालसम्म महानगरभित्रका पाँच विद्यालयमा जोखिमयुक्त बस्तीका बासिन्दालाई अस्थायी आश्रय दिइएको छ। विश्व निकेतन विद्यालयमा ७० जना, गुह्येश्वरी विद्यालयमा ५२ जना, कुलेश्वरको जनविकास विद्यालयमा २५१ जना, महेन्द्र सरस्वती आधारभूत विद्यालय (टेकु) मा २० जना लगायतलाई बसोबास र खानपानको व्यवस्था गरिएको महानगरले जनाएको छ।
महानगरको शिक्षा विभागले आवश्यकता परे थप ७० विद्यालयलाई पनि तत्काल प्रयोग गर्न सकिने गरी आश्रय स्थलका रूपमा तयारी अवस्थामा राखिएको बताएको छ।
मेयर साहले जोखिममा रहेका नागरिकहरूलाई सुरक्षित स्थानमा सार्दै आवश्यक सहयोग र उद्धार कार्यमा महानगर पूर्ण रूपमा लागिपरेको बताएका छन्।
प्रकाशित मिति: १८ आश्विन २०८२, शनिबार
प्रतिक्रिया