पोखरा । म्याग्दीमा क्षमताभन्दा बढी यात्रु बोकेको बोलेरो जिप दुर्घटना हुँदा १५ जना घाइते भएका छन् । दुर्घटना बेनी नगरपालिका–९ तुसारेपानीमा भएको जिल्ला प्रहरी कार्यालय म्याग्दीले जनाएको छ ।
रघुगंगा गाउँपालिका–८ बाट सदरमुकाम बेनीतर्फ गइरहेको ग २ च ५९३० नम्बरको बोलेरो जिप बुधबार दिउँसो ब्रेक फेल भएर करिब १ सय मिटर तल खसेको प्रहरी निरीक्षक सागर पौडेलले जानकारी दिए ।
दुर्घटनामा घाइते भएका सबै यात्रुहरूलाई उद्धार गरी उपचारका लागि प्रादेशिक अस्पताल बेनीमा भर्ना गरिएको प्रहरीले जनाएको छ ।
प्रहरीका अनुसार जिपमा सिट क्षमताभन्दा धेरै यात्रु सवार रहेका थिए । दुर्घटनाको विस्तृत विवरण संकलन भइरहेको र आवश्यक अनुसन्धान जारी रहेको प्रहरीले जनाएको छ ।
प्रकाशित मिति: २२ आश्विन २०८२, बुधबार
प्रतिक्रिया