पाल्पा । जुवा खेल्नका लागि पैसा सापटी नदिएको रिसमा एक वृद्ध महिलाको निर्मम हत्या भएको छ ।
जिल्ला प्रहरी कार्यालय पाल्पाका अनुसार माथागढी गाउँपालिका–४ देउगीरकी ७६ वर्षीया फुलमाया जिसीलाई सोही गाउँका ३७ वर्षीय मीनबहादुर विश्वकर्माले कुटपिट गरी हत्या गरेका हुन् ।
प्रहरी नायब उपरीक्षक (डीएसपी) होम प्रकाश चौधरीका अनुसार सोमबार राति करिब १२ बजे जुवा खेल्दा पैसा हारेपछि विश्वकर्माले जिसी दम्पतीसँग सापटी मागेका थिए । वृद्ध दम्पतीले पैसा दिन अस्वीकार गरेपछि विश्वकर्माले हँसियाले प्रहार गरेका थिए ।
घटनामा फुलमायाका श्रीमान् ८२ वर्षीय प्रेमबहादुर जिसी घाइते भएका छन् । टाउकोमा गम्भीर चोट लागेकी फुलमायाको घटनास्थलमै मृत्यु भएको प्रहरीले जनाएको छ ।
गम्भीर घाइते प्रेमबहादुरलाई उपचारका लागि पाल्पाबाट मंगलबार बिहान बुटवल रेफर गरिएको छ ।
घटनापछि फरार भएका मीनबहादुर विश्वकर्मालाई प्रहरीले राति नै आफ्नै घरबाट पक्राउ गरेको डीएसपी चौधरीले जानकारी दिएका छन् ।
प्रहरीले हत्यासम्बन्धी थप अनुसन्धान सुरु गरेको जनाएको छ ।
प्रकाशित मिति: ४ कार्तिक २०८२, मंगलबार
प्रतिक्रिया