काठमाडौं । अधिवक्ता स्वागत नेपालसँग केन्द्रीय साइबर ब्यूरो, भोटाहिटीले करिब ६ घण्टासम्म बयान लिएको छ।
ब्यूरोको भनाइअनुसार आइतबार नेपाल प्रहरीको केन्द्रीय साइबर ब्यूरोमा उपस्थित भएका अधिवक्ता नेपालसँग करिब साढे पाँचदेखि छ घण्टासम्म सोधपुछ गरिएको थियो। ब्यूरोका प्रवक्ता एसपी दीपकराज अवस्थीले बताए, ‘उहाँ हिजो आइपुग्नुभयो, करिब ६ घण्टा कुराकानीपछि फर्किनुभयो।’
अवस्थीका अनुसार सोमबार सार्वजनिक बिदा परेकाले मंगलबार थप बयान प्रक्रिया अघि बढाइनेछ। अधिवक्ता नेपाल पनि मंगलबार पुनः उपस्थित हुने भन्दै ब्यूरोबाट बाहिरिएका थिए।
उनीमाथि साइबर अपराधसम्बन्धी उजुरीका आधारमा अनुसन्धान भइरहेको प्रहरी स्रोतले जनाएको छ, तर आरोपको स्वरूपबारे विस्तृत विवरण हालसम्म सार्वजनिक गरिएको छैन।
यता अधिवक्ता स्वागत नेपालले भने आफूले प्रधानमन्त्री सुशीला कार्कीविरुद्ध प्रश्न उठाएको कारण आफूलाई साइबर मुद्दामा तानिएको दाबी गरेका छन्।
प्रकाशित मिति: १० कार्तिक २०८२, सोमबार
प्रतिक्रिया