काठमाडौं । नेकपा (एमाले)का केन्द्रीय सदस्य विष्णु रिजालले काठमाडौं महानगरपालिकाका मेयर बालेन्द्र शाह (बालेन) लाई तत्काल गिरफ्तार गर्न सरकारसँग माग गरेका छन्।
शनिबार मध्यराति मेयर शाहले सामाजिक सञ्जालमा राजनीतिक दलहरू र विदेशी शक्तिलाई लक्षित गर्दै अश्लील शब्द प्रयोग गरेको स्टाटस लेखेपछि नेता रिजालले गम्भीर आपत्ति जनाएका हुन्।
सामाजिक सञ्जालमार्फत प्रतिक्रिया दिंदै रिजालले लेखेका छन्, “बालेन साहले हद नाघ्दै गएका छन् र देशमाथि खतरा बन्दैछन्। नेपालमा गाँजा प्रतिबन्धित छ। गृहमन्त्री ओमप्रकाश अर्यालले सिंहदरबार जलाउने मतियार बालेनलाई अविलम्ब गिरफ्तार गर्नुपर्छ, नत्र अराजकता र मुठभेड बढ्नेछ।”
रिजालले मेयर बालेनलाई संघीय शासन र लोकतान्त्रिक प्रणालीविरुद्ध भड्काउने गतिविधिमा संलग्न रहेको आरोप समेत लगाएका छन्।
शनिबार राति बालेनले फेसबुकमा लेखेको स्टाटसमा अमेरिका, भारत, चीन र प्रमुख राजनीतिक दलहरू ,नेकपा एमाले, नेपाली कांग्रेस, माओवादी केन्द्र, राष्ट्रिय स्वतन्त्र पार्टी र राष्ट्रिय प्रजातन्त्र पार्टीलाई लक्षित गर्दै अपमानजनक शब्द प्रयोग गरेका थिए।
विवाद बढेपछि उनले केही समयमै उक्त स्टाटस हटाए पनि त्यसको स्क्रिनसट सामाजिक सञ्जालमा भाइरल बनेको छ र व्यापक आलोचना भइरहेको छ।
प्रकाशित मिति: १६ कार्तिक २०८२, आइतबार
प्रतिक्रिया