काठमाडौं । नेकपा (एकीकृत समाजवादी) पुनर्गठन अभियानले घनश्याम भुसाललाई संयोजक चयन गरेको छ । शनिबार बसेको अभियानको केन्द्रीय समिति बैठकले भर्चुअल माध्यमबाट सर्वसम्मत रूपमा भुसाललाई संयोजकमा चयन गरेको नेता दामोदर अर्यालले जानकारी दिएका छन् ।
६७ जना केन्द्रीय सदस्यको सहभागिता रहेको बैठकमा संयोजक भुसालले ‘वर्तमान राजनीतिक अवस्था र हाम्रो दायित्व’ शीर्षकमा विस्तृत धारणा प्रस्तुत गर्दै संगठन सुदृढीकरणका दिशामा अघि बढ्न आह्वान गरेका थिए ।
बैठकले आगामी मङ्सिर महिनामा आयोजना हुने राष्ट्रिय भेलाको तयारीबारे पनि विस्तृत छलफल गरेको बताइएको छ ।
यसअघि एकीकृत समाजवादीका अध्यक्ष माधवकुमार नेपाल माओवादी केन्द्रलगायत दलहरूसँगको एकता प्रक्रियामा सक्रिय रहेका बेला भुसाल लगायतका नेताहरू भने सो प्रक्रियामा सहभागी भएका थिएनन् ।
पार्टीको बहुमत समूह नयाँ नेपाली कम्युनिस्ट पार्टीमा समाहित भएपछि भुसाल नेतृत्वको समूहले पुरानै पार्टीलाई पुनर्गठन गर्ने तयारी अघि बढाएको छ भने रामकुमारी झाँक्रीसहितका केही नेताहरू एमाले प्रवेशको तयारीमा रहेको स्रोतको दाबी छ ।
प्रकाशित मिति: २३ कार्तिक २०८२, आइतबार
प्रतिक्रिया