काठमाडौं । राष्ट्रिय परीक्षा बोर्डले कक्षा १२ को पूरक (ग्रेड सुधार) परीक्षाको नतिजा सार्वजनिक गरेको छ । बोर्डको आज बसेको बैठकले परीक्षा परिणाम अनुमोदन गर्दै सार्वजनिक गरेको हो ।
बोर्डका अनुसार यस वर्षको पूरक परीक्षामा ७३.४१ प्रतिशत विद्यार्थी उत्तीर्ण भएका छन् । गत असोज ७ र ८ गते सम्पन्न परीक्षामा देशभरबाट १ लाख ४ हजार २६ जना विद्यार्थी सहभागी भएका थिए, जसमा ७६ हजार ३६७ जना विद्यार्थी सफल भएका छन् । त्यस्तै, चार जनाको परीक्षाफल रद्द गरिएको बोर्डले जनाएको छ ।
यसअघि गत साउन ११ गते सार्वजनिक नियमित नतिजामा ६१.१७ प्रतिशत विद्यार्थी ग्रेडेड भएका थिए ।
विद्यार्थीहरूले आफ्नो नतिजा नेपाल टेलिकमको १६०० नम्बरमा एसएमएस गरेर हेर्न सक्नेछन् ।
प्रकाशित मिति: २३ कार्तिक २०८२, आइतबार
प्रतिक्रिया