बुटवल । सहकारी ठगी र सङ्गठित अपराधको आरोपमा थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको मुद्दाको सुनुवाइका लागि आज पेसी तोकिएको छ ।
उच्च अदालत तुलसीपुर बुटवल इजलासका न्यायाधीश ओमप्रकाश अर्याल र तेजनारायण पौडेलको इजलासले गत हप्तामात्रै लामिछानेको मूल मुद्दाको प्रतिलिपि माग गर्ने आदेश दिएपछि थप कानुनी प्रक्रिया अघि बढेको थियो ।
उच्च अदालत बुटवल तुलसीपुरका सूचना अधिकारी रामबहादुर कुवरका अनुसार आज उक्त मुद्दाको सुनुवाइ पेसी तोकिएको हो । सुप्रिम सहकारीमा ठगी गरेको आरोपमा लामिछाने पुर्पक्षका लागि थुनामा छन् ।
उनले सहकारीमा आफ्नो जिम्मेवारीअनुसारको बिगो रकम दाखिला गर्दै जमानतका लागि निवेदन दिए पनि रुपन्देही जिल्ला अदालतले गत साउन २६ गते रिहा गर्न अस्वीकार गरेको थियो ।
जिल्ला अदालतको निर्णयविरुद्ध लामिछानेले भदौ ९ गते उच्च अदालतमा पुनरावेदन दर्ता गरेका थिए । सहकारी ठगीसँगै सङ्गठित अपराधको अभियोगसमेत जोडेर मुद्दा हेरिएको छ ।
सुप्रिम सहकारी प्रकरणमा अभियोजन दर्ता गर्दा रवि लामिछानेसहितका प्रतिवादीहरूलाई कुल १० करोड ९९ लाख ३६ हजार रुपैयाँ बराबरको सामूहिक बिगो कायम गरिएको छ । त्यसमा लामिछानेले आफ्नो चौथाइ भागअनुसार २ करोड ७४ लाख ८४ हजार रुपैयाँ बराबरको बैंक जमानत निवेदनसहित अदालतमा पेस गरेका छन् ।
प्रकाशित मिति: २७ कार्तिक २०८२, बिहिबार
प्रतिक्रिया