काठमाडौं । जनार्दन शर्मा नेतृत्वको प्रगतिशील राष्ट्रिय अभियानले ३१ सदस्यीय केन्द्रीय संयोजन समिति गठन गरेको छ ।
बिहीबार काठमाडौंमा आयोजित पत्रकार सम्मेलनमार्फत समितिको नामावली सार्वजनिक गर्दै अभियानले आफ्नो दीर्घकालीन राजनीतिक तथा सामाजिक लक्ष्यहरू पनि प्रस्तुत गरेको हो ।
अभियानले भ्रष्टाचार, विभेद र असमानतालाई देशका मुख्य शत्रुका रूपमा परिभाषित गर्दै तिनमाथि विजय प्राप्त गर्ने सङ्कल्प व्यक्त गरेको छ । साथै, सांस्कृतिक समानतामा आधारित समावेशी समाज निर्माण र नेपाली राजनीतिको आधारभूत पुनर्संरचना गर्ने उद्देश्य पनि अघि सारिएको छ ।
कार्यक्रममा अभियानले विगतका सबै अग्रगामी आन्दोलनका सहिद, घाइते तथा बेपत्ता योद्धाहरूको सपना पूरा गर्ने प्रतिबद्धता जनायो ।
त्यस्तै, देशभित्रका साथै विदेशमा रहेका नेपालीहरूबीच पनि प्रगतिशील राष्ट्रिय अभियानका सम्पर्क समिति गठन गर्ने तयारी भएको अभियानले जानकारी दिएको छ ।
प्रकाशित मिति: २७ कार्तिक २०८२, बिहिबार
प्रतिक्रिया