काठमाडौं । नेपालका लागि चिनियाँ राजदूत छन सङले आगामी आमनिर्वाचन सफलतापूर्वक सम्पन्न गर्न चीनले नेपाललाई आवश्यक सबै सहयोग उपलब्ध गराउने प्रतिबद्धता व्यक्त गरेका छन्। प्रमुख सञ्चारमाध्यमका सम्पादकहरूसँगको छलफलमा उनले द्विपक्षीय परियोजनाहरू—विशेषगरी ‘बेल्ट एन्ड रोड’ (BRI)—मा उल्लेखनीय प्रगति भइरहेको बताए।
उनका अनुसार व्यापार, लगानी, औद्योगिक पार्क निर्माणलगायत क्षेत्रमा चीन–नेपाल सहकार्य अघि बढिरहेको छ। केही परियोजनामा भएको ढिलाइ सामान्य प्रक्रिया मात्र भएको बताएका राजदूतले स्थायी सरकार गठनपछि ती काम तीव्र गतिमा अघि बढ्ने विश्वास व्यक्त गरे।
चीनले हाल सार्वजनिक गरेको पञ्चवर्षीय योजनाले छिमेकी मुलुकहरूको आर्थिक विकासका नयाँ सम्भावना खोल्ने उल्लेख गर्दै उनले नेपाललाई कृषि निर्यात विस्तारका क्षेत्रमा प्राथमिकता दिइएको जानकारी दिए। नेपालका कृषि उत्पादन चिनियाँ बजारमा प्रवेश गराउने तयारी अन्तिम चरणमा छ, उनले भने।
राजदूत छनले नेपाल–चीन सम्बन्ध सधैँ मैत्रीपूर्ण रहेको उल्लेख गर्दै ‘एक चीन’ नीतिप्रति नेपालका सरकारहरूको निरन्तर समर्थनप्रति आभार व्यक्त गरे। उनले जेनजी आन्दोलनका अगुवाहरूले पनि चीन–नेपाल सम्बन्धमा बाधा नपर्ने स्पष्ट धारणा राखेको अनुभव सुनाए।
चीनको १५औँ पञ्चवर्षीय योजनामा उच्चस्तरीय विकास, खुला आर्थिक नीति, सहकार्य विस्तार, जनहित केन्द्रित कार्यक्रम र प्रतिव्यक्ति आय २० हजार डलर पुर्याउने लक्ष्य रहेको जानकारी दिँदै उनले नेपालसँगको सहकार्य अझ विस्तार हुने विश्वास व्यक्त गरे।
प्रकाशित मिति: २९ कार्तिक २०८२, शनिबार
प्रतिक्रिया