काठमाडौं । नेकपा (एमाले) कि नेतृ एवं पूर्वमन्त्री ज्वाला कुमारी साहले सिमरामा भएको हिजोको घटनाको जिम्मेवारी सरकारले लिनुपर्ने बताएकी छन् । नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले सरकारले एमालेका नेताहरुलाई रोक्नका लागि षड्यन्त्र भएको बताएकी हुन् । सरकारको चुनाव गर्ने नियत नै नरहेको उनको दाबी छ ।
‘हिजोको जिम्मेवारी सरकारले लिनुपर्ने हुन्छ । हिजोको घटना सरकारले गराएको हो । सरकारले एमालेका नेताहरुलाई रोक्नुपर्छ, कांग्रेसका नेताहरुलाई रोक्नुपर्छ भनेर हो । हिजोको घटना त सरासर सरकारले नै मिलेर गराएको छ,’– उनले भनिनु् ।
हिजो (बुधबार) नेकपा (एमाले) का महासचिव शंकर पोखरेल र पोलिटव्युरो सदस्य महेश बस्नेत सिमरा एयरपोर्ट हुँदै कार्यक्रममा जान आउने थाहा पाएपछि जेन–जीहरुले अवरोध गरेका थिए । जेन–जी समूहको अवरोधका कारण हिजो सिमरा उड्ने फ्लाइट नै क्यान्सिल भएको थियो । नेतृ साहले एमालेले चाहेको भए हिजो एक मिनेटमा खरानी बनाइदिने अवस्था रहेकोमा पनि आफूहरुले संयमता अपनाएको बताईन् ।
‘यदि एमालेले चाहेको भए एक मिनेटमा खरानी हुने अवस्था हुन्छ । तर, एमाले पार्टी कहिले पनि त्यो बाटो अपनाउँदैन । एमाले पार्टी सधैं जनताको पक्षमा, सधैं जनताको सेवकको रुपमा लागिरहन्छौं,’– उनले भनी ।
साथै, उनले नेपाली कांग्रेसका सभापति शेरबहादुर देउवा र तत्कालीन परराष्ट्रमन्त्री डा.आरजु राणा देउवामाथि हत्या गर्ने नियतले भएको आक्रमणमा संलग्नलाई सरकारले कारबाही गर्न नचाहेको उनको आरोप छ ।
- रिपाेर्टस क्लव नेपाल
प्रकाशित मिति: ४ मंसिर २०८२, बिहिबार
प्रतिक्रिया