काठमाडौं । आगामी प्रतिनिधिसभा निर्वाचनका लागि नेपाली कांग्रेसका महामन्त्री गगन थापालाई काठमाडौं–४ बाट एकल तथा सर्वसम्मत सिफारिस गरिएको छ।
क्षेत्रीय कार्यसमितिको बुधबार बसेको बैठकले थापालाई प्रत्यक्षतर्फ उम्मेदवारको रूपमा एकमतले सिफारिस गरेको क्षेत्रीय सभापति श्यामकृष्ण संगतले जानकारी दिए। संगतका अनुसार प्रत्यक्षतर्फ थापाको नाममा कुनै प्रतिस्पर्धी प्रस्ताव नआएकाले सर्वसम्मत एकल सिफारिस गरिएको हो।
समानुपातिक तर्फ भने तीनजनाको नाम सिफारिस गरिएको छ। तीमध्ये राधा घले, नर्मदा पोखरेल र राजन विश्वकर्मा परेका छन्।
यसअघि महामन्त्री थापाको नाम रोल्पा, सर्लाही–४ र धनकुटाबाट समेत सिफारिस भइसकेको थियो। थापा काठमाडौं–४ बाट तीन पटक प्रत्यक्ष निर्वाचित भइसकेका छन्। २०६४ सालको पहिलो संविधानसभा चुनावमा भने उनी समानुपातिक कोटाबाट सांसद बनेका थिए।
प्रकाशित मिति: २४ मंसिर २०८२, बुधबार
प्रतिक्रिया