काठमाडौं । प्रधानन्यायाधीश प्रकाशमान सिंह राउतले मानवअधिकारको विषयलाई राजनीति र निजी स्वार्थबाट अलग राख्नुपर्ने बताएका छन्।
अन्तर्राष्ट्रिय मानवअधिकार दिवसको अवसरमा बुधबार जनकपुरमा आयोजित कार्यक्रममा बोल्दै उनले मानवअधिकार पछिल्लो समयमा अत्यन्त जटिल, संवेदनशील र पेचिलो बनेको उल्लेख गरे। उनका अनुसार यदि मानवअधिकारमा राजनीति प्रवेश गर्छ भने वातावरण विषाक्त बन्छ र यसका सार्वभौमिक मूल्य, मान्यता र प्रभावमा नकारात्मक असर पर्छ।
प्रधानन्यायाधीश राउतले भने, ‘मानवअधिकारमा निजी विचार र आस्थाभन्दा माथि उठेर हेर्ने प्रयास गर्नु आवश्यक छ। विषाक्त राजनीतिक चक्रव्यूह र चंगुलबाट मानवअधिकारलाई अलग राख्न सक्दा मात्र यसको सम्मान, संरक्षण र सम्वर्द्धन सम्भव छ।’
उनीले २४ भदौको जेनजी आन्दोलनको घटनाप्रति पनि कुरा गर्दै अदालत, बार एसोसिएसन र हजारौँ मुद्दाका मिसिल जलेको स्मरण गराए। उनले भने, ‘आन्दोलनमा नेपाली जनताको इतिहास र सम्पत्ति दुवै जलेका छन्। अदालत, मिसिल जले पनि अदालतले प्रदान गर्ने न्याय र निष्ठा नजलेको छ।’
प्रकाशित मिति: २४ मंसिर २०८२, बुधबार
प्रतिक्रिया