नयाँ दिल्ली । भारतका प्रधानमन्त्री नरेन्द्र मोदी र इजरायली प्रधानमन्त्री बेन्जामिन नेतन्याहूबीच बुधबार टेलिफोनवार्ता भएको छ। प्रधानमन्त्री मोदीले सामाजिक सञ्जाल ‘एक्स’मार्फत जानकारी दिँदै मित्र नेतन्याहूसँग व्यापक विषयमा संवाद भएको उल्लेख गरेका छन्।
मोदीका अनुसार दुवैले भारत–इजरायल रणनीतिक साझेदारीमा भएको प्रगतिमा समीक्षा गर्दै दुई देशबीचको सहयोगलाई अझ मजबुत बनाउन सहमति जनाए। उनले दुवै देश आतंकवादविरुद्ध शून्य सहनशीलताको साझा प्रतिबद्धतामा दृढ रहेको पुनः स्पष्ट पारे।
मोदीले क्षेत्रीय स्थायित्वका लागि जारी प्रयासहरूप्रति भारतले निरन्तर समर्थन गर्ने आश्वासन पनि दिए। प्रेस इन्फर्मेसन ब्युरो (पीआईबी) का अनुसार, वार्ताका क्रममा गाजा शान्ति योजना छिट्टै कार्यान्वयन गर्ने विषयमा पनि नेताद्वयबीच विचार–विमर्श भएको थियो।
इजरायली प्रधानमन्त्री कार्यालयले एक्समार्फत दुई नेताबीच ‘न्यानो र सकारात्मक संवाद’ भएको र निकट भविष्यमै प्रत्यक्ष भेटघाट गर्ने समझदारी बनेको जनाएको छ।
समाचार एजेन्सी पीटीआईले इजरायलका उच्च स्रोतहरूलाई उद्धृत गर्दै हालै दिल्लीमा भएको बम विस्फोटका कारण नेतन्याहूले भारत यात्रा स्थगित गरेको भन्ने अड्कलहरू असत्य रहेको पनि स्पष्ट पारेको छ।
प्रकाशित मिति: २५ मंसिर २०८२, बिहिबार
प्रतिक्रिया