बुटवल । सहकारी ठगी तथा संगठित अपराधसम्बन्धी अभियोगमा थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र तत्कालीन गोर्खा मिडियाका सञ्चालक छविलाल जोशीसम्बन्धी मुद्दामा उच्च अदालत बुटवलमा बहस सकिएको छ।
उच्च अदालत बुटवलका सूचना अधिकारी रामबहादुर कुँवरका अनुसार बाबुदेव आचार्य र तेजनारायण पौडेलको संयुक्त इजलासमा बिहीबार दुवै पक्षका कानुन व्यवसायीहरूले आ–आफ्ना तर्क प्रस्तुत गरी बहस सम्पन्न गरेका हुन्। बहस सकिएपछि अब अदालतको आदेश पर्खाइमा मुद्दा पुगेको छ।
यसअघि मंसिर २५ गते तोकिएको पेशी ‘हेर्न नमिल्ने’ परेपछि स्थगित भएको थियो भने त्यसअघि मंसिर ११ गतेको पेशी लामिछानेका कानुन व्यवसायीको अनुरोधमा स्थगन गरिएको थियो।
बुटवलस्थित सुप्रिम सहकारी ठगी प्रकरणमा पुर्पक्षका लागि थुनामा रहेका लामिछानेले आफूलाई तोकिएको बिगो रकम दाखिला गरेपछि पनि जिल्ला अदालत रुपन्देहीका न्यायाधीश नारायण सापकोटाको इजलासले साउन २६ गते उनलाई रिहा गर्न अस्वीकार गरेको थियो।
जिल्ला अदालतको उक्त आदेशविरुद्ध लामिछानेले भदौ ९ गते उच्च अदालत बुटवलमा निवेदन दर्ता गराएका थिए।
प्रकाशित मिति: ३ पुस २०८२, बिहिबार
प्रतिक्रिया