काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले जेन–जी आन्दोलनका क्रममा भएका घटनाको छानबिनका लागि आफूलाई बयान लिन खोजिएको विषयमा आपत्ति जनाएका छन्।
मंगलबार मदन भण्डारी स्मृति प्रतिष्ठानको कार्यक्रममा बोल्दै ओलीले भने, ‘देशको पूर्वप्रधानमन्त्रीसँग बयान लिन खोज्नु सरकारको तमासा हो। यो चुनाव नहुने प्रपञ्च मात्रै हो।’
ओलीले भने, आफू प्रधानमन्त्री हुँदा भएको आन्दोलनको विषयलाई अहिले छानबिनको नाममा राजनीतिक प्रतिशोधका लागि प्रयोग गरिँदैछ। उनले थपे, ‘प्रधानमन्त्रीसँग पनि बयान लिइन्छ। पासपोर्ट रोक्का गर्ने जस्ता अफवाह फैलाएर नेताहरूको मानमर्दन गर्ने काम भइरहेको छ। यो सबै चुनावको वातावरण बिगार्ने खेल हो।’
पूर्वप्रधानमन्त्री ओलीले वर्तमान सरकारले तत्कालीन सरकार प्रमुखलाई बयानको दायरामा ल्याएर निर्वाचनको तयारी धमिलो बनाउने प्रयास गरेको दाबी गरे। उनले राजनीतिक स्टन्टबाजी बन्द गरेर देशलाई निर्वाचनमा केन्द्रित हुन सरकारलाई आग्रह पनि गरे।
जेन–जी आन्दोलनको समयमा ओली प्रधानमन्त्री थिए। सोही घटनाको छानबिनका लागि गठित आयोगले हालै तत्कालीन गृहमन्त्रीसँग बयान लिएको थियो। आयोगले तत्कालीन प्रधानमन्त्री ओलीलाई पनि सोधपुछ गर्न सक्ने चर्चा चलिरहेकाले ओलीले सार्वजनिक रूपमा यसको विरोध गरेका हुन्।
उनले राहदानी (पासपोर्ट) रोक्का गर्ने जस्ता हल्ला फैलाएर नेताहरूको प्रतिष्ठा र मानमर्दन गर्ने प्रयास भइरहेको भन्दै सरकारको नियतप्रति प्रश्न उठाए।
प्रकाशित मिति: १५ पुस २०८२, मंगलबार
प्रतिक्रिया