जनकपुर । धनुषाको मिथिला नगरपालिकामा ऐलानी जग्गा विवादका क्रममा प्रहरीले १६ राउन्ड अश्रुग्याँस प्रहार गरेको छ।
मिथिला नगरपालिका–२, नक्टाझिज सुग्जोरस्थित सतलोक आश्रमले ऐलानी जग्गा अतिक्रमण गरेको आरोप लागेपछि स्थानीयबासी र आश्रमका सदस्यबीच झडप भएको थियो। विवाद बढ्दै गएपछि नेपाल प्रहरीले ५ राउन्ड र सशस्त्र प्रहरीले ११ राउन्ड अश्रुग्याँस प्रहार गरेको धनुषा प्रहरी प्रमुख एसपी रुगम कुँवरले जानकारी दिए।
उनका अनुसार विवादित जग्गाको मापन कार्य आज भइरहेको थियो। विवाद उग्र बन्दै गएपछि प्रहरीले नियन्त्रणका लागि बल प्रयोग गरेको हो। हाल अवस्था सामान्य रहेको छ र दुवै पक्षबाट केही व्यक्तिहरू सामान्य घाइते भएका छन्।
विवादका कारण आक्रोशित स्थानीयहरूले जनकपुर–ढल्केवर सडक खण्ड अन्तर्गत महेन्द्रनगर–औरही पुल क्षेत्रमा सडक अवरुद्ध गर्दै नाराबाजी गरेका थिए। प्रहरीले घटनाबारे आवश्यक अनुसन्धान भइरहेको जनाएको छ।
प्रकाशित मिति: २६ पुस २०८२, शनिबार
प्रतिक्रिया