कुलमान न घरको न घाटको भए, अब पालो बालेनको : महेश बस्नेत

काठमाडौँ । नेकपा एमालेका सचिव महेश बस्नेतले उज्यालो नेपाल पार्टीका अध्यक्ष कुलमान घिसिङको राजनीतिक भविष्य संकटमा परेको टिप्पणी गरेका छन्। बस्नेतका अनुसार, राष्ट्रिय स्वतन्त्र पार्टी (रास्वपा) सँगको एकता प्रयास असफल भएपछि घिसिङ ‘न घरको न घाटको’ स्थितिमा पुगेका छन्।

बस्नेतले बताए अनुसार, रवि लामिछानेमा भरोसा गर्दा घिसिङले मन्त्री पद र समानुपातिक उम्मेदवार बन्ने दुवै अवसर गुमाएका छन्। उनले रविको राजनीतिलाई ‘माकुराको जालो’ सँग तुलना गर्दै, त्यसमा एकपटक परेपछि उम्किन असम्भव भएको टिप्पणी गरेका छन्।

साथै बस्नेतले नेकपा एमाले र नेपाली कांग्रेस जस्ता पुराना दलहरूलाई चरासँग तुलना गर्दै भनेका छन् कि ती दलहरूसँग यस्ता जालो तोड्ने क्षमता छ। तर, कुलमान घिसिङ र बालेन शाह जस्ता पात्रहरू भने पुतलीझैँ कमजोर भएको उनले उल्लेख गरेका छन्। उनका अनुसार, अन्तर्राष्ट्रिय शक्तिले बुनेको रविको जालोमा परेर कुलमान अन्धकारतिर धकेलिएका छन्।

बस्नेतले रवि लामिछानेले पार्टी एकताको नाममा कुलमानलाई प्रयोग गरेर उनलाई बिचल्लीमा पारेको र समानुपातिक उम्मेदवार दर्ता गर्ने समय समेत छुटाएको बताए। सामाजिक सञ्जालमा चर्चित यी पात्रहरू राजनीतिक रूपमा सफल हुन सक्ने संभावना कम रहेको बस्नेतको दाबी छ, र नेपालको वास्तविक शक्ति स्थापित दलहरूमा नै रहेको उनको निष्कर्ष छ।

प्रकाशित मिति: २७ पुस २०८२, आइतबार