इरान प्रदर्शनमा मृत्यु हुनेको सङ्ख्या ५ हजार नाघ्यो

तेहरान ।  इरानमा सरकारविरोधी प्रदर्शनमा सुरक्षा बलको कडा दमनका कारण मृत्यु हुनेको संख्या पाँच हजार नाघेको छ। मानव अधिकार समूहका अनुसार देशभर इन्टरनेट सेवा ठप्प पारिएका कारण वास्तविक संख्या अझ बढी हुन सक्ने अनुमान गरिएको छ। पछिल्ला तथ्यांक अनुसार मृत्यु हुनेमा ४,७१६ जना प्रदर्शनकारी, २०३ जना सरकारी कर्मचारी, ४३ जना बालबालिका र ४० जना सर्वसाधारण रहेका छन्। साथै, दुई हप्ताभित्र करिब २६,८०० प्रदर्शनकारीलाई हिरासतमा लिइएको छ।

इरानी अधिकारीहरूले अहिलेसम्म ३,११७ जनाको मृत्यु भएको मात्र आधिकारिक रूपमा स्वीकार गरेका छन्। सरकारी सञ्चारमाध्यमहरूले प्रदर्शनकारीहरूलाई अमेरिका र इजरायलले उक्साएको आरोप लगाउँदै ‘दङ्गाकारी’ भनेका छन्। तर, मानव अधिकारवादी संस्थाहरूले सन् १९७९ को इस्लामिक क्रान्तिपछि इरानमा भएको सबैभन्दा ठूलो रक्तपात भएको दाबी गरेका छन्।

यसैबीच, अमेरिकाले इरानको गतिविधि र मानवअधिकार उल्लङ्घनलाई लिएर कडा चेतावनी दिएको छ। अमेरिकी राष्ट्रपति डोनाल्ड ट्रम्पले मध्यपूर्वमा ठूलो नौसैनिक बल पठाउने घोषणा गरेका छन्। उनले इरानलाई आणविक कार्यक्रम र मानवअधिकार उल्लङ्घनमा वार्ता र संवादको माध्यमबाट समाधान खोज्न दबाब दिएका छन्, नत्र कडा सैन्य कदम चाल्न सक्ने चेतावनी दिएका छन्।

इरानमा दमन र विरोध प्रदर्शनबीच राजनीतिक तनाव बढिरहेको छ। इरानी महान्यायाधिवक्ताले पक्राउ परेका प्रदर्शनकारीमाथि मृत्युदण्ड दिन सकिने संकेत दिएका छन्। यसले अन्तर्राष्ट्रिय समुदायमा चिन्ता थपाएको छ र मानवअधिकार समूहहरूले तत्काल दमन रोक्न तथा निष्पक्ष छानबिन गर्न इरानी सरकारलाई आग्रह गरेका छन्।

प्रकाशित मिति: ९ माघ २०८२, शुक्रबार