एजेन्सी । अमेरिकाका विभिन्न भागमा शक्तिशाली र खतरनाक शीतकालीन आँधी चलिरहँदा कम्तीमा ३ जनाको मृत्यु भएको छ । आँधीका कारण लाखौँ मानिस विद्युत् सेवाबाट वञ्चित भएका छन् ।
राष्ट्रिय मौसम सेवा (एनडब्ल्यूएस)का अनुसार टेक्सासदेखि न्यु इङ्ग्ल्यान्डसम्म जीवन नै जोखिममा पर्ने मौसमी अवस्था देखिएको छ । आँधीका कारण विद्यालय, सडक र हवाई सेवा व्यापक रूपमा प्रभावित भएका छन् ।
अत्यधिक चिसोका कारण लुइसियानामा हाइपोथर्मियाबाट २ जनाको मृत्यु भएको राज्य स्वास्थ्य विभागले पुष्टि गरेको छ । टेक्सासको अस्टिन सहरमा पनि चिसोको असरका कारण एक जनाको मृत्यु भएको बताइएको छ ।
यसैबिच, न्युयोर्क सिटीका मेयर जोहरान ममदानीले सामाजिक सञ्जाल एक्समा शनिबार कम्तीमा ५ जनाको मृत्यु भएको जानकारी दिएका छन् । यद्यपि ती मृत्युको कारण अझै पुष्टि भएका छैनन् ।
आइतबार दिउँसोसम्म करिब ९ लाख घरधुरीमा बिजुली आपूर्ति बन्द भएको पावर आउटेज डट कमले जनाएको छ । त्यस्तै, १० हजारभन्दा बढी उडान रद्द गरिएको फ्लाइट अवेयरले जानकारी दिएको छ ।
भारी हिमपात, असिना र ‘फ्रिजिङ रेन’ जस्ता जोखिमपूर्ण मौसममा करिब १८ करोड अमेरिकी नागरिक प्रभावित हुनसक्ने अनुमान गरिएको छ, जुन कुल जनसङ्ख्याको आधाभन्दा बढी हो ।
राष्ट्रिय मौसम सेवाकी मौसमविद् एलिसन सान्तोरेलीका अनुसार हिउँ र बरफ छिट्टै पग्लिने सम्भावना छैन । ‘हिउँ र बरफ हट्न निकै समय लाग्नेछ, जसले उद्धार र पुनर्स्थापना प्रयासलाई थप जटिल बनाउनेछ,’ उनले सीबीएस न्युजसँग बताइन् ।
सर्वसाधारणहरूलाई अनावश्यक यात्रा नगर्न, न्यानोमा बस्न र आपतकालीन निर्देशन पालना गर्न अधिकारीहरूले आग्रह गरेका छन् ।
प्रकाशित मिति: १२ माघ २०८२, सोमबार
प्रतिक्रिया