एजेन्सी । मध्यपूर्व क्षेत्रमा बढ्दो तनावका बीच संयुक्त राज्य अमेरिकाले इजरायल र साउदी अरबलाई ठूलो परिमाणमा हतियार बिक्री गर्ने सम्झौता स्वीकृत गरेको छ। ट्रम्प प्रशासनले इजरायलका लागि ६ अर्ब ६७ करोड अमेरिकी डलर र साउदी अरबका लागि ९ अर्ब अमेरिकी डलर बराबरको हतियार बिक्री अनुमोदन गरेको हो।
एजेन्सीहरूका अनुसार अमेरिकाले साउदी अरबलाई ७३० वटा ‘पैट्रियट’ मिसाइल तथा सम्बन्धित उपकरण उपलब्ध गराउनेछ। यसले साउदी अरबको हवाई तथा मिसाइल प्रतिरक्षा क्षमतालाई थप सुदृढ बनाउने बताइएको छ।
त्यसैगरी, इजरायलले ३० वटा ‘एपाचे’ आक्रमण हेलिकप्टर र तीन हजार २५० वटा हल्का ट्याक्टिकल सवारीसाधन खरिद गर्नेछ। एपाचे हेलिकप्टर र त्यससँग सम्बन्धित उपकरणको लागत ३ अर्ब ८० करोड अमेरिकी डलर रहेको छ भने हल्का ट्याक्टिकल सवारीसाधनको लागत १ अर्ब ९८ करोड अमेरिकी डलर निर्धारण गरिएको छ।
अमेरिकी प्रशासनले यी हतियार बिक्रीले क्षेत्रीय सैन्य सन्तुलनमा प्रतिकूल असर नपर्ने दाबी गरेको छ। साथै, यसले इजरायल र साउदी अरबलाई आफ्ना सीमाहरू तथा जनसङ्ख्या केन्द्रहरूको सुरक्षा सुनिश्चित गर्न सहयोग पुग्ने जनाएको छ।
यद्यपि, केही अमेरिकी नेताहरूले भने यो सम्झौता हतारमा अघि बढाइएको भन्दै आपत्ति जनाएका छन्। विश्लेषकहरूका अनुसार यो निर्णय मध्यपूर्वमा बढ्दो तनाव र सम्भावित सैन्य गतिविधिको पृष्ठभूमिमा आएको हो, जसले क्षेत्रीय सुरक्षा अवस्थालाई थप जटिल बनाउन सक्ने चिन्ता व्यक्त गरिएको छ।
प्रकाशित मिति: १७ माघ २०८२, शनिबार
प्रतिक्रिया