काठमाडौं – अमेरिकी राष्ट्रपति डोनाल्ड ट्रम्पले विश्वप्रसिद्ध हार्वर्ड विश्वविद्यालयसँग १ अर्ब डलर क्षतिपूर्ति माग गर्ने घोषणा गरेका छन् । यो कदम ट्रम्प प्रशासन र हार्वर्ड विश्वविद्यालयबीच लामो समयदेखि चलिरहेको विवादको पछिल्लो कडीका रूपमा आएको हो ।
यो विषय सार्वजनिक हुनुअघि न्यूयोर्क टाइम्सले ट्रम्प प्रशासनले हार्वर्डसँगको वार्ताका क्रममा सुरुमा राखिएको २० करोड डलरको मागबाट पछि हट्नुपरेको उल्लेख गरेको थियो । सोही समाचारको सन्दर्भ दिँदै ट्रम्पले हार्वर्डमाथि कडा आलोचना गरेका छन् ।
सोमबार राति आफ्नो सामाजिक सञ्जाल प्लेटफर्म ट्रुथ सोसलमा पोस्ट गर्दै ट्रम्पले न्यूयोर्क टाइम्सको रिपोर्टलाई उद्धृत गरेका छन् । उनले हार्वर्ड विश्वविद्यालयले उक्त पत्रिकालाई “धेरै बकवास खुवाएको” आरोप लगाउँदै, वास्तविकता लुकाउन खोजिएको दाबी गरेका छन् ।
ट्रम्प प्रशासनका अधिकारीहरूले हार्वर्ड विश्वविद्यालयले पछिल्लो समय भएका प्यालेस्टिनी समर्थक प्रदर्शनहरूका क्रममा देखिएका यहूदी विरोधी गतिविधिहरूलाई नियन्त्रण गर्न तथा सम्बोधन गर्न पर्याप्त कदम नचालेको आरोप लगाउँदै आएका छन् । प्रशासनका अनुसार विश्वविद्यालयले क्याम्पसमा बढ्दो घृणाजन्य गतिविधिप्रति उदासीनता देखाएको छ ।
तर हार्वर्ड विश्वविद्यालयले यी आरोपहरूलाई निराधार भन्दै अस्वीकार गरेको छ । विश्वविद्यालय प्रशासनले क्याम्पसमा सबै समुदायको सुरक्षा र अभिव्यक्ति स्वतन्त्रताबीच सन्तुलन कायम गर्न आफूहरू प्रतिबद्ध रहेको जनाएको छ ।
यसअघि गत वर्ष अप्रिल महिनामा, ट्रम्प प्रशासनले हार्वर्ड विश्वविद्यालयलाई दिइँदै आएको करिब २ अर्ब डलर बराबरको अनुसन्धान अनुदान रद्द गरेको थियो । साथै, संघीय सरकारबाट प्राप्त हुँदै आएको अन्य आर्थिक सहयोगसमेत निलम्बन गरिएको थियो ।
विश्लेषकहरूका अनुसार ट्रम्प प्रशासन र प्रतिष्ठित शैक्षिक संस्थाबीचको यो विवादले अमेरिका भित्र शिक्षा, राजनीति र अभिव्यक्ति स्वतन्त्रतासम्बन्धी बहसलाई अझ चर्काउने देखिन्छ ।
प्रकाशित मिति: २० माघ २०८२, मंगलबार
प्रतिक्रिया