काठमाडौ । बैतडीको पुर्चौडीबाट बझाङतर्फ जाँदै गरेको जन्ती बोकेको बस दुर्घटनामा एक जना वडा सचिवसहित १३ जनाको मृत्यु भएको छ।
पुर्चौडी नगरपालिका–७, बडचौरमा भएको उक्त दुर्घटनामा दार्चुलाको शैल्यशिखर नगरपालिका–१ का वडा सचिव बसन्तराज जोशीको निधन भएको हो। प्रहरीले जनाएको अनुसार, बसन्तराज जोशी बझाङको बित्थडचिर गाउँपालिका–७ का स्थायी बासिन्दा थिए। उनी शैल्यशिखर नगरपालिका कार्यालयको पशु सेवा शाखामा नायब प्राविधिक सहायक (ना.प्रा.स.) पदमा कार्यरत थिए र वडा सचिवको जिम्मेवारी पनि सम्हालिरहेका थिए।
जोशी आफ्नो पेशागत जिम्मेवारीका साथै नेपाल निजामती कर्मचारी संगठन, शैल्यशिखर नगर कार्यसमितिको सचिव पनि थिए। विवाहको खुशी साट्न हिँडेको जन्ती बस दुर्घटनामा परेपछि उनको निधनले गाउँ नै शोकमा डुबेको छ।
दुर्घटनामा घाइते भएका व्यक्तिहरूको उद्धार र मृतकहरूको सनाखतको कार्य अहिले पनि जारी रहेको प्रहरीले जानकारी दिएको छ।
प्रकाशित मिति: २३ माघ २०८२, शुक्रबार
प्रतिक्रिया