मुगु। मुगुबासीको मुख्य आम्दानीको स्रोत पशु पालन हो। तर सोरु गाउँपालिका वडा नं. १० र ११ मा कृषकले पाल्दै आएका भेडा–बाख्रा अज्ञात रोगको चपेटामा परेका छन्।
पुस र माघ महिनामा अचानक भेडा–बाख्राहरु मर्न थालेपछि स्वास्थ्यकर्मीहरू प्रभावित क्षेत्रका भेडीगोठमा पुगेर उपचार र रोग पहिचानमा जुटेका छन्।
स्थानीय कृषक पूर्ण बहादुर मल्लले बताए अनुसार, “हामी तीन पुस्तादेखि भेडा पालन गर्दै आएका छौं। ६० वटा भेडा मर्न थालेका छन्, टाउको र घाँटी सुनिन थालेको, रौं खुइलिएको, छेर्ने र हिँड्न गाह्रो हुने अवस्था देखिएको छ। घरेलु औषधी र एग्रोभेटको उपचार गर्दा पनि मृत्युदर कम भएको छैन।”
हालसम्म करिब १ सय ५० भन्दा बढी भेडा–बाख्रा मृत्युवरण गरेको छ। जिल्लाको पशु अस्पताल, पशु सेवा कार्यालय र प्रदेश प्रयोगशालाबाट औषधीसहितको टोली आएको छ। सोरु गाउँपालिका अध्यक्ष धर्मबहादुर शाहीका अनुसार, गोठमा गएर रोगको अध्ययन भइरहेको छ र ल्याब रिपोर्ट आएपछि थप औषधी तथा रोकथामका उपाय गरिनेछ।
प्रकाशित मिति: २ फाल्गुन २०८२, शनिबार
प्रतिक्रिया