काठमाडौं । मुलुककै सर्वाधिक सफल एयरलाइन्सको दाबी गर्ने बुद्ध एयरको जहाजबाट तेल चुहिएको अवस्थामा यात्रुले समयमै सूचना दिँदा ठूलो दुर्घटनाबाट जोगिएको छ। प्राविधिकहरूको पूर्ण परीक्षणपछि उडानका लागि तयारी अवस्थामा रहेको जहाजबाट एयर फ्युल चुहिएको यात्रुले देखेपछि तत्काल उडान रोकिएको थियो।
बाराको सिमराबाट काठमाडौंका लागि उडान भर्न लागेको ९एन–एआईटी नम्बरको जहाजको देब्रे पंखा छेउबाट एयर फ्युल चुहिएको पाइएको थियो। जहाजमा सवार यात्रु सुरक्षित रूपमा उतारेर उनीहरूलाई अर्को जहाजमार्फत काठमाडौं पठाउने तयारी भइरहेको छ।
सिमरा विमानस्थलमा पार्किङ गरिएको जहाजको समस्याबारे अध्ययन सुरु गरिएको छ। जहाजबाट ठूलो मात्रामा तेल चुहिँदा पनि तत्काल ध्यान नदिइएको घटनाले बुद्ध एयरको मर्मत–सम्भारमा लापरवाही प्रष्ट देखाएको छ। यात्रुहरूले भने त्रासका बीच ठूलो दुर्घटनाबाट जोगिएको बताएका छन्।
प्रकाशित मिति: ८ फाल्गुन २०८२, शुक्रबार
प्रतिक्रिया