काठमाडौं । राष्ट्रिय स्वतन्त्र पार्टीका बरिष्ठ नेता बालेन शाहविरुद्ध गृह मन्त्रालयमा उजुरी परेको छ । युवराज पौडेल सफलले बालेनविरुद्ध उजुरी हालेका हुन् । उजुरीमा बालेनले थर परिवर्तनका क्रममा झूटो विवरण दिएको आरोप लगाइएको छ ।
उजुरीमा शाहले नागरिकता ऐन, २०६३ विपरित कार्य गरेको दाबी गर्दै उनको नागरिकता खारेज गरी कानुनी कारबाही गर्न माग गरिएको छ। निवेदनमा २०६३ साल पौस ६ गते जिल्ला प्रशासन कार्यालय, महोत्तरीबाट ५१९२ नम्बरको नागरिकता लिँदा उनको नागरिकतामा थर ‘साह’ उल्लेख गरिएको तर पछि काठमाडौँ महानगरपालिकाको मेयर भएपछि जिल्ला प्रशासन कार्यालय काठमाडौँमा २०७९ असार १९ गते नागरिकताको प्रतिलिपि लिँदा थर परिवर्तन गरी फरक विवरण उल्लेख गरिएको दाबी गरिएको छ।
उजुरीकर्ताले नागरिकता ऐन, २०६३ को दफा १२ अनुसार कुनै पनि नेपाली नागरिकले झूटो विवरण दिएर नागरिकता लिएको प्रमाणित भएमा त्यस्तो नागरिकता रद्द गर्न सकिने कानुनी व्यवस्था रहेको उल्लेख गरेका छन्।
निवेदनमा सम्बन्धित कागजातको अनुसन्धान गरी कानुन बमोजिम नागरिकता खारेज गर्न तथा पाँच वर्षसम्म कैद र एक लाख रुपैयाँसम्म जरिवाना गर्न माग गरिएको छ।
प्रकाशित मिति: ८ फाल्गुन २०८२, शुक्रबार
प्रतिक्रिया