काठमाडौं । सर्वोच्च अदालतले प्रतिनिधिसभा विघटनविरुद्ध दायर रिट निवेदनलाई फागुन २१ गते हुने निर्वाचनको भोलिपल्ट अर्थात् फागुन २२ गतेका लागि साधारण तारेख दिएको छ।
रिटकर्तामध्येका अधिवक्ता कृतिनाथ शर्मा पौडेलका अनुसार अदालतले चुनावपछि सुनुवाइ अगाडि बढाउने गरी साधारण तारेख तोकेको हो।
यसअघि कात्तिक १२ गते संवैधानिक इजलासले १६ वटा रिट निवेदनमाथि प्रारम्भिक सुनुवाइ गर्दै बाटोको म्याद बाहेक सात दिनभित्र लिखित जवाफ पेस गर्न आदेश दिएको थियो। त्यसपछि नेकपा एमालेका सांसद तथा नेपाली काँग्रेसले छुट्टाछुट्टै रिट दायर गरेका थिए।
उक्त रिटहरूमा विपक्षी बनाइएकाहरूबाट लिखित जवाफ पेस भए पनि अदालतले हालसम्म साधारण तारेख मात्र दिएको छ। यसबीच प्रारम्भिक सुनुवाइ मात्र भएको र विस्तृत सुनुवाइ कहिले हुने भन्ने टुंगो लाग्न बाँकी रहेको जनाइएको छ।
रिट निवेदनमा प्रतिनिधिसभा विघटन तथा वर्तमान प्रधानमन्त्री सुशीला कार्की असंवैधानिक रूपमा नियुक्त भएको दाबी गर्दै राष्ट्रपतिबाट गरिएको निर्णय बदर गर्न माग गरिएको छ।
प्रकाशित मिति: ८ फाल्गुन २०८२, शुक्रबार
प्रतिक्रिया