काठमाडौं । सिरहाको कल्याणपुर नगरपालिका–१२ बेल्हाकट्टीमा तीन महिनाअघि भएको डकैती घटनामा संलग्न रहेको आरोपमा प्रहरीले एक भारतीय नागरिकसहित चार जनालाई पक्राउ गरेको छ। जिल्ला प्रहरी कार्यालय सिरहाले आइतबार पत्रकार सम्मेलनमार्फत उनीहरूलाई सार्वजनिक गरेको हो।
प्रहरीका अनुसार पक्राउ परेकाबाट दुई थान कटुवा पेस्तोल, चार राउण्ड गोली, करिब ३० ग्राम खैरो हेरोइनजस्तो देखिने लागूऔषध तथा केही मोबाइल बरामद गरिएको छ।
जिल्ला प्रहरी कार्यालयका सूचना अधिकारी एवं प्रहरी नायब उपरीक्षक रमेशबहादुर पालका अनुसार पक्राउ परेकामाथि डाँका, ज्यान मार्ने उद्योग, हातहतियार तथा लागूऔषधसम्बन्धी मुद्दामा अनुसन्धान भइरहेको छ।
गत मंसिर ३ गते हतियारधारी समूहले स्थानीय भोला महतोको घरमा प्रवेश गरी करिब ६ लाख रुपैयाँ बराबरको सुनचाँदीका गरगहना, मोबाइल र ड्रोन क्यामेरा लुटपाट गरेका थिए। घटनाका क्रममा चलाइएको गोली लागेर दुई जना गम्भीर घाइते भएका थिए।
प्रहरीले घटनामा प्रयोग गरिएको अटोरिक्सा पनि नियन्त्रणमा लिएको छ भने फरार रहेका अन्य व्यक्तिहरूको खोजी कार्य जारी रहेको जनाएको छ।
प्रकाशित मिति: ११ फाल्गुन २०८२, सोमबार
प्रतिक्रिया