काठमाडाैं। रोल्पामा मंगलबार बिहान भएको जिप दुर्घटनामा एक जनाको घटनास्थलमै मृत्यु भएको छ भने १२ जना घाइते भएका छन् ।
इलाका प्रहरी कार्यालय होलेरीका वरिष्ठ सई ताराबहादुर छहरीका अनुसार अन्दाजी ४५ वर्षीया एक महिलाको घटनास्थलमै मृत्यु भएको हो । मृतकको सनाखत हुन बाँकी रहेको प्रहरीले जनाएको छ । घाइतेमध्ये तीन जनाको अवस्था गम्भीर रहेको बताइएको छ ।
दाङको घोराहीबाट शहिद मार्ग हुँदै होलेरीतर्फ जाँदै गरेको लु १ ज ४८५४ नम्बरको जिप बिहान करिब सवा ९ बजे रून्टीगढी गाउँपालिका–५ खुम्बासमा दुर्घटनामा परेको थियो । जिप करिब डेढ सय मिटर तल खसेको प्रहरीले जनाएको छ ।
घटनास्थल दाङ र रोल्पाको सिमानामा पर्छ । घाइते सबैलाई उपचारका लागि घोराहीस्थित राप्ती स्वास्थ्य विज्ञान प्रतिष्ठान पठाइएको छ ।
दुर्घटनाबारे थप अनुसन्धान भइरहेको प्रहरीले जनाएको छ ।
प्रकाशित मिति: १२ फाल्गुन २०८२, मंगलबार
प्रतिक्रिया