कैलाली। कैलाली निर्वाचन क्षेत्र नम्बर २ बाट प्रतिनिधिसभा सदस्यका लागि प्रगतिशील लोकतान्त्रिक पार्टी (प्रलोपा) का उम्मेदवार डम्बर बहादुर रावलले आफ्नो उम्मेदवारी निष्क्रिय बनाएका छन् । उनले नेकपा (एमाले) का उम्मेदवार सूर्य बहादुर थापालाई चुनावी सहयोग गर्ने सहमति गरेका हुन् ।
आज कैलाली क्षेत्र नम्बर २ मा दुई दलका प्रतिनिधिबीच भएको सहमतिपत्रमा प्रत्यक्ष निर्वाचनमा एमाले उम्मेदवार थापालाई पूर्ण सहयोग गर्ने र प्रलोपाका उम्मेदवार रावलले आफ्नो उम्मेदवारी निष्क्रिय बनाउने उल्लेख छ । सहमतिमा प्रत्यक्षतर्फ एमालेलाई साथ दिने र समानुपातिकतर्फ आ–आफ्नो चुनाव चिन्हमा मत माग्ने व्यवस्था गरिएको छ ।
यो सहमतिले कैलाली–२ मा चुनावी समीकरणमा महत्वपूर्ण प्रभाव पार्ने देखिएको छ । क्षेत्रमा एमालेका उम्मेदवार सूर्य बहादुर थापा बलियो अवस्थामा रहे पनि विभिन्न दलका उम्मेदवारहरूको उपस्थितिले मत विभाजन हुने सम्भावना थियो । प्रलोपाका रावलको समर्थनले एमालेको पक्षमा थप बल पुग्ने अनुमान गरिएको छ ।
प्रलोपा हालै गठन भएको नयाँ दल हो, जसले विभिन्न क्षेत्रमा आफ्ना उम्मेदवार खडा गरेको थियो । यो घटनालाई एमालेले क्षेत्रीय स्तरमा आफ्नो संगठन विस्तार तथा गठबन्धन विस्तारको सफलताका रूपमा लिएको छ ।
फागुन २१ गते हुने प्रतिनिधिसभा निर्वाचनमा कैलाली–२ मा अब मुख्य प्रतिस्पर्धा एमाले उम्मेदवार थापा र अन्य दलका उम्मेदवारहरूबीच केन्द्रित हुने देखिएको छ ।
प्रकाशित मिति: १६ फाल्गुन २०८२, शनिबार
प्रतिक्रिया