वासिङ्टन डिसी। अमेरिकी राष्ट्रपति डोनाल्ड ट्रम्पले इरानमाथि अमेरिका र इजरायलले संयुक्त रूपमा गरेको सैन्य आक्रमणको बचाउ गर्दै यसलाई ‘अमेरिकी जनताको रक्षाका लागि चालिएको निर्णायक कदम’ बताएका छन् ।
आक्रमणको केही समयपछि वासिङ्टनमा सम्बोधन गर्दै ट्रम्पले भने, “केही समयअघि अमेरिकी सेनाले इरानमा ठूलो सैन्य अभियान सुरु गरेको छ । हाम्रो उद्देश्य इरानी शासनबाट आउन सक्ने खतरालाई जरैदेखि उखेल्नु र अमेरिकी नागरिकहरूको सुरक्षा सुनिश्चित गर्नु हो । यो कदम आवश्यक थियो र समयमै चालिएको छ ।”
इजरायल र अमेरिकाले संयुक्त रूपमा इरानको विभिन्न सैन्य तथा रणनीतिक स्थलहरूमा मिसाइल तथा हवाई हमला गरेको पुष्टि भएको छ । इरानको राजधानी तेहरानमा श्रृङ्खलाबद्ध ठूला विस्फोटका आवाजहरू सुनिएका छन् । स्थानीय सञ्चारमाध्यमहरूले तेहरानका विभिन्न भागमा आगलागी तथा धुवाँको मुस्लो देखिएको रिपोर्ट गरेका छन् ।
इजरायली रक्षामन्त्री इजरायल काट्जले यो आक्रमणलाई ‘पूर्व-सतर्कता कारबाही’ भन्दै इरानबाट सम्भावित जवाफी हमलाको जोखिमलाई मध्यनजर गर्दै इजरायलभर संकटकाल (emergency state) घोषणा गरेका छन् । उनले भने, “यो आक्रमण इजरायलको अस्तित्व र सुरक्षाका लागि अपरिहार्य थियो । हामीले इरानको आणविक तथा मिसाइल क्षमतामाथि लक्षित प्रहार गरेका छौं ।”
अमेरिकी रक्षा विभाग (पेन्टागन) का अधिकारीहरूले पनि आक्रमणमा अमेरिकी सेनाको प्रत्यक्ष सहभागिता रहेको पुष्टि गरेका छन् । आक्रमणमा प्रयोग भएका हतियार तथा लक्ष्यहरूबारे विस्तृत जानकारी सार्वजनिक गरिएको छैन ।
यो घटनाले मध्यपूर्वमा तनाव थप बढाएको छ । इरानले यसलाई ‘युद्धको घोषणा’ भन्दै कडा प्रतिक्रिया जनाउने संकेत गरेको छ भने अन्तर्राष्ट्रिय समुदायले तत्काल युद्धविराम तथा संयमको अपिल गरेको छ । संयुक्त राष्ट्रसङ्घको सुरक्षा परिषद्ले आपत्कालीन बैठक बोलाउने तयारी गरेको छ ।
अमेरिकी राष्ट्रपति ट्रम्पले थप भने, “हामी शान्ति चाहन्छौं, तर अमेरिकी जनतामाथि कुनै पनि खतरा सहन तयार छैनौं । इरानले आफ्नो आक्रामक नीति परिवर्तन नगरेसम्म हामी आवश्यक कदम चाल्नेछौं ।”
यो घटनाको विश्वव्यापी प्रभाव तथा इरानको जवाफी कारबाहीको सम्भावनाले अन्तर्राष्ट्रिय बजार तथा कूटनीतिक क्षेत्रमा तरङ्ग ल्याएको छ ।
प्रकाशित मिति: १६ फाल्गुन २०८२, शनिबार
प्रतिक्रिया